Bakı Ağır Cinayətlər Məhkəməsində talassemiyalı uşaqların müalicə pullarını mənimsəyən dəstənin üzvü həbs olunub.

Musavat.com xəbər verir ki, hakim Azad Məcidovun sədrliyi ilə keçirilən prosesdə müttəhimlər kürsüsünə "Urmedhelp” və “My Doc Tour” adlı şirkətlərin sahibi Nuridə Seyidova və digər iki nəfər – Aynur Bayramova və Aysel Məmmədova çıxarılıblar.

Prosesdə zərərçəkmişlər - Şahbacı İsayeva 28 min 274 manat, Şahid Mövsümov 20 min 868 manat və Vüqar Eminov 28 min manat mülki iddia qaldırıblar. Təqsirləndirilən şəxslər və vəkilləri mülki iddianın icraata götürülməsinə etiraz ediblər. Mülki iddia icraata qəbul edilib.

Hakim müttəhim Nuridə Seyidovaya sərbət ifadə vermək təklif olub. O, hazırkı mərhələdə ifadə vermək iqtidarında olmadığını deyib, gələcək iclaslarda ifadə verəcəyini söyləyib. Digər təqsirləndirilən Aynur Bayramova da hazırkı mərhələdə ifadə vermək istəməyib. O, xəstə olduğunu deyib.

Aysel Məmmədova isə sərbəst ifadəsində bildirib ki, Azərbaycan Beynəlxalq Universitetinin "Müalicə işi" fakültəsini bitirib, 7 il təhsil alıb. O deyib ki, Yevlax rayonunda 5 il sahə həkimi işləyib: "Öz ərizəmlə işdən çıxdım və Bakı şəhərinə gəldim. "Baku Medical" özəl klinikasında həkim işləməyə başladım. Xəstə yaxınları vasitəsi ilə 2022-ci ildən Aynuru tanıyıram. Özəl klinikada olduğum müddətdə xaricdə müalicə ilə məşğul olmuşuq. Bununla bağlı lisenziyanın olub-olmadığını bilməmişəm".

Təqsirləndirilən şəxs qeyd edib ki, daha sonra "Urmedhelp” və “My Doc Tour” adlı şirkətində həkim-ekspert köməkçisi işinə düzəlib. Deyib ki, beynəlxalq təşkilatların sponsorluğu vasitəsi ilə xəstələrin xarici ölkədə müalicə aparılması barədə danışıqları olub.

Hakim "işə düzələndə əmək müqaviləsində nə qədər maaş alacağınız göstərilmişdi" - deyə sual edib. Təqsirləndirilən şəxs əməkhaqlarının normal olduğunu, xəstə yaxınları tərəfindən klinikaya ödənilən vəsaitin 20-25 faizinin ona çatdığını deyib.

Aysel Məmmədova söyləyib ki, onlar tərəfindən siyahıya alınan xəstələrə Türkiyədə müalicə olunacaqları deyilib: "Mərkəzi Gömrük Xəstəxanasından həkim Mircəlal Kazımi qaraciyər və ilik transplantasiyası xəstələrini bizə yönləndirib. Nuridə və Aynur deyiblər ki, beynəlxalq təşkilatlar xəstələrin müalicə olması üçün ödənişlər edir. Mənim vəzifəm xəstə tapıb xaricə göndərmək idi. Onlardan bir-iki dəfə bu məsələnin necə həll edilməsini soruşmuşam. Deyiblər ki, sən bizim işlərimizə qarışma".

Aysel Məmmədova qeyd edib ki, bəzi həkimlərin vasitəsi ilə 20-yə yaxın xəstəni şirkətə cəlb edib, daha iki nəfər xəstəni isə şirkətə özü gətirib: "Xəstələr şirkətə yönləndirmə vasitəsi ilə cəlb olunublar. Mən xəstələrdən özüm pul götürməmişəm. Xəstə yaxınlarından pulları Toğrul adlı şəxs götürüb. Toğrul şirkətdə mühasib idi. Səkinə baş mühasib idi. Xəstə yaxınlarından alınan pullar şirkətin seyfinə qoyulub. Pulların taleyindən mənim xəbərim olmayıb".

Onun sözlərinə görə, eyni zamanda həkim Tariyel Əhmədov, Mərkəzi Klinik Xəstəxanasından Eldar adlı həkim də şirkətə xəstələr yönəldiblər.

İttihama görə, talassemiyalı xəstə uşaqların valideynlərinin Daxili İşlər Nazirliyinə müraciətindən sonra ötən ilin fevralında cinayət işi başlanılıb.

Müəyyən edilib ki, Nuridə Seyidova digərləri ilə əlbir olaraq 36 talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib.

Qeyd olunub ki, övladı qan xəstəliyindən əziyyət çəkən bir neçə valideyn Nuridə Seyidovaya ümumilikdə 67 min dollar veriblər. Nuridə Seyidova valideynlərə söz verib ki, sənədlər hazırlanandan sonra azyaşlı xəstələri Türkiyənin Antalya şəhərindəki “Antalya Medical Park” hospitala yollayacaq.

Amma pulu alsa da, vədinə əməl etməyib.

Bundan başqa, Nuridə Seyidova yalandan bildirib ki, Şəkinin Cumakənd kənd sakini Vüqar İsayevin talasemiyadan əziyyət çəkən qızı Gülbər İsayevanın ilik transplantasiyası üçün tələb olunan laborator müayinələr, donor xərci, cərrahi əməliyyat və digər xərcləri qarşılamaq üçün tələb olunan pulu sponsorlar ödəyəcəkdilər. Guya əməliyyata 70 min dollar tələb olunub, onun da 20 min dollarını “Çinar Plaza”da ofisdə Nuridə Seyidova ondan alıb, qalan məbləği isə yardım olaraq xaricdəki donor təşkilatlar ödəyəcəyinə vəd edib. Sonra zərərçəkmişə məlum olub ki, ortada nə donor var, nə bir şey.

Digər zərərçəkmiş Tural Nəsmiyev iki azyaşlı övladını müalicəsi üçün 2022-ci ilin mayında Nuridə Seyidovaya 35 min dollar verib. Nuridə Seyidova onun övladlarının Türkiyədəki Samsun şəhərində müalicə olunacağını bildirib. Həmin ilin oktyabrında Türkiyəyə gedib xəstəxanada gözləməyi tapşırıb. Tural Nəsmiyev 3 aydan çox həmin xəstəxanada qalsa da, nə donor, nə də əməliyyat olub. Hər dəfə Nuridə Seyidovayla əlaqə saxlayanda, sonuncu ona səbrli olmağı məsləhət görüb.

Nəhayət, aldadıldığını başa düşən Tural Nəsmiyev Türkiyədə keçirdiyi aylar ərzində xərclədiyi 8 min manat ziyanla geri dönüb.

İttiham aktında göstərilib ki, Nuridə Seyidova vətəndaşlardan pulları əsasən “Çinar Plaza”dakı ofisdə alıb.

İstintaq zərərçəkən kimi 36 nəfəri müəyyən edib. Bunlar azyaşlı övladları talassemiyadan əziyyət çəkənlərdir.

Dəstə üzvləri zərərçəkmişlər Ceyran Musayeva və Elman Nuriyevdən 20 min 400, Məsumə Hacıyeva, Ömər Məmmədov və Sahid Mövsümovdan 17 min, Mənsur Qarayev, Natiq Qubatov və Elnur İsbəndiyarovdan 25 min 500, Kəmalə Muliyeva, Nüşabə Məmmədova, Taleh Hacıməmmədov, Şahbacı İsayeva, Xəyal İlmanovdan 34 min manat məbləğində vəsaiti alaraq dələduzluq ediblər.

Nuridə Seyidova öz qulluq mövqeyindən istifadə etməklə Elxan Əliyevdən 12 min 745 manat və Rasim Cavadovdan 25 min 500 manat alaraq onların övladlarını Türkiyədə əməliyyat olunmasına köməklik göstərəcəyi ilə bağlı yalan vəd verib.

Daha sonra Nuridə Seyidova digər təqsirləndirilən Aysel Məmmədova ilə qabaqcadan əlbir olub, Tural Nəsmiyevdən 59 min 500 manat, Zeynəb Cəlilovadan 25 min manat, Kamil Əhmədovdan 23 min manat, Ramin Dadaşovdan 51 min manat, Xəyal İsayevdən 51 min manat, Lamiyə Hüseynovadan 20 min 50 manat, Nərgiz Mahmudovadan 9 min manat, Elnarə Xanmirzəyevadan 25 min manat, Sevinc Səmədovadan 22 min 500 manat, Elvin Fətəliyevdən 25 min manat alıb.

O da müəyyən edilib ki, Nuridə Seyidova tanışı Aysel Bayramova ilə əlbir olaraq, Aynur Orucova, Solmaz Eyvazova və Vüqar Eminovdan 25 min 500, Laura Həsənovadan 51 min, Günay Ağayevadan 25 min, Aytəkin İsayevadan 19 min, Elnaz Hacıyevadan 5 min, Faiq Nəcəfovdan 5 min 100 manat məbləğində pul alıb.

Övadları xəstəlikdən əziyyət çəkən zərərçəkmişlər – Sevinc Səmədova, Faiq Nəcəfov, Elnur İsbəndiyarov, Xəyal İlmanov, Kəmalə Muliyeva, Elman Nuriyev, Taleh Hacıməmmədov, Elvin Fətəliyev, Ceyran Musayeva, Mənsumə Hacıyeva, Solmaz Eyvazova, Nüşabə Məmmədova, Mənsur Qarayev, Lamiyə Hüseynova, Sahid Mövsümov, Aysel Abdullayeva, Tural Nəsmiyev, Vüqar İsayev, Elnarə Xanmirzəyeva, Kamil Əhmədov, Elnaz Hacıyeva, Vüqar Eminov, Aytəkin İsayeva, Ramin Dadaşov, Aynur Orucova, Zeynəb Cəlilova, Günay Ağayeva, Ömər Məmmədov, Xəyal İsayev, Laura Həsənova, Rasim Cavadov, Nərgiz Mahmudova, Natiq Qubatov, Şahbacı İsayeva, Ramin İsmayılov və Elxan Əliyevdir.
Proses mayın 15-də davam edəcək.